Cysylltu cymunedau

Cysylltu cymunedau i godi’r gwastad o ran mynediad at swyddi, addysg a chyfleoedd

Er bod ein hardal yn ffyniannus ar y cyfan, mae pocedi sylweddol o amddifadedd ac anghydraddoldebau yn bodoli ymhlith ein cymunedau. Mae'r rhain yn cynnwys pobl sy'n cael eu dadleoli gan y pandemig a thrwy ddad-ddiwydiannu.

Yn aml, nid yw llawer ohonynt yn gallu elwa rhyw lawer ar ein cymdeithas lewyrchus.  Nid yn unig y mae problemau hanesyddol gyda thrafnidiaeth yn ein hardal ond rydym hefyd yn llusgo y tu ôl i gyfartaledd y DU ar gyfer cysylltedd digidol.

Mae cysylltu'r cymunedau hyn â chyfleoedd economaidd-gymdeithasol o fewn ein gafael. Mae 140,000 o bobl yn croesi Afon Hafren bob dydd ac mae dros hanner poblogaeth y DU yn byw o fewn 2 awr i'n ffiniau. Mae’r gwaith o drydaneiddio Prif Rwydwaith y Great Western bron â chwpla ac mae gwerth biliynau o bunnoedd o fuddsoddiadau i systemau metro dinas-ranbarth yn mynd rhagddynt. Rydym am sicrhau y gall pobl leol groesi ffiniau'n hawdd a chael mynediad cyflym i bwerdai economaidd eraill, gan gynnwys Injan Canolbarth Lloegr a Phwerdy Gogledd Lloegr.

Beth rydym am ei wneud?

Ein huchelgais yw adeiladu ar y sylfeini hyn i gysylltu cymunedau'n well â'i gilydd yn ogystal â'r system drafnidiaeth genedlaethol, rhoi hwb i gynhyrchiant, datgloi twf tai a chefnogi ein newid i ddyfodol 'sero-net'. Byddai hyn yn sicrhau bod pawb yn gallu cyrchu canolfannau cyflogaeth, addysg o ansawdd uchel a'r sefydliadau diwylliannol a'r ardaloedd o harddwch naturiol eithriadol sydd gan ein dinasoedd, o’r arfordir i gefn gwlad, i’w cynnig. 

Rydym yn awyddus i fapio sut y gallai rhwydwaith rheilffyrdd cenedlaethol a rhanbarthol 'delfrydol' edrych yn 2050 i ddeall pa fylchau sy'n bodoli ac awgrymu syniadau ar gyfer rhaglen waith i’r ardal yn y dyfodol.