"Does dim syndod bod Porth y Gorllewin yn arwain y diwydiant Hydrogen drwodd i'r trawsnewidiad Sero Net"

Arweiniwyd y Porth Hydrogen gan Bartneriaeth Porth y Gorllewin mewn cydweithrediad â Hydrogen South West, Clwstwr Diwydiannol De Cymru a Chynghrair GW4.  Nod y gynhadledd oedd trafod y rôl y gallai Hydrogen ei chwarae mewn economi sero net gyda gweithdai drwy gydol y dydd i helpu busnesau i ddeall y cyfleoedd y gallai trosglwyddo i ynni Hydrogen eu cynnig.

Yn benodol, tynnodd y gynhadledd sylw at y potensial i'r ardal fod yn arweinydd rhyngwladol mewn hedfan cynaliadwy a chanfod ffyrdd o ddatgarboneiddio diwydiant trwm fel rhan o lansiad Llwybr Cyflenwi Hydrogen Porth y Gorllewin. 

Tynnodd gwleidyddion, gan gynnwys Julie James AoS, Gweinidog Newid Hinsawdd Cymru, yr Arglwydd Callanan, Gweinidog y DU â chyfrifoldeb dros Hydrogen a Chris Skidmore AS, Cadeirydd Adolygiad Sero Net y DU, sylw at rôl bwysig partneriaethau cyhoeddus/preifat fel Porth y Gorllewin wrth gyrraedd targedau sero net cenedlaethol.

Dywedodd Julie James AoS: "Mae gwaith Porth y Gorllewin yn hanfodol wrth gefnogi'r newid angenrheidiol i'n heconomïau trwy'r chwyldro diwydiannol nesaf tuag at gymdeithas sero net.

"Yng Nghymru, rydym wedi ymrwymo i symud ein system ynni i ffwrdd o danwydd ffosil a thuag at ynni adnewyddadwy, fel llwybr hanfodol tuag at gyflawni ein targedau statudol a'n rhwymedigaethau rhyngwladol fel cenedl gyfrifol.

"Rwy'n mawr obeithio y bydd Porth y Gorllewin yn parhau i yrru'r gwaith partneriaeth pwysig iawn sydd ei angen arnom, ac y bydd Llywodraeth Cymru yn parhau i gynnig cefnogaeth, ar draws ein holl uchelgeisiau cyffredin."

Dywedodd yr Arglwydd Callanan: "Mae partneriaethau traws-ranbarthol llwyddiannus, fel Porth y Gorllewin, yn hanfodol i'n cystadleurwydd hirdymor fel teyrnas unedig.

"Does dim syndod bod Porth y Gorllewin yn arwain y diwydiant Hydrogen drwodd i'r trawsnewidiad Sero Net.  O'r diwydiant glo yng Nghymru yn y 18fed a'r 19eg ganrif i Orsafoedd Ynni Niwclear Hinkley yn yr 20fed a'r 21ain ganrif, mae'r rhanbarth hwn wir wedi bod yn ganolbwynt ar gyfer arloesedd ynni.

"A nawr mae'n mynd i ddod yn fainc arbrofi ar gyfer arddangos y technolegol, hyfywedd Hydrogen."

Porth y Gorllewin yw'r bartneriaeth draws-ranbarthol ar gyfer De Cymru a Gorllewin Lloegr, gan ddod â busnesau, prifysgolion ac arweinwyr lleol at ei gilydd i gydweithio i ddod yn Bwerdy Ynni Gwyrdd y DU ac ychwanegu £34bn at economi'r DU erbyn 2030.

Ochr yn ochr â'r Llwybr Cyflawni, cyhoeddodd Porth y Gorllewin hefyd adroddiad gan City Science a ddarparodd sail dystiolaeth i lywio gwaith Hydrogen y dyfodol yn yr ardal.

Gallwch weld araith gyfan yr Arglwydd Callanan ar ein sianel YouTube