Porth y Gorllewin yn derbyn Gwobr Gydweithredu 'Canmoliaeth Uchel' am Strategaeth Rheilffyrdd ragorol
Mae Gweledigaeth Rheilffyrdd Porth y Gorllewin 2050, sy'n nodi'r uchelgeisiau ar gyfer dyfodol rheilffyrdd ledled De Cymru a Gorllewin Lloegr, wedi ennill gwobr Cymeradwyaeth Uchel am gydweithio yng ngwobrau Rhanbarthol De-orllewin y Sefydliad Siartredig Priffyrdd a Thrafnidiaeth (CIHT).
Rhoddwyd y wobr hon ar ôl asesiad cynhwysfawr gan y pwyllgor a oedd yn cydnabod gwaith gwych Porth y Gorllewin a'i sefydliadau partner wrth gynhyrchu strategaeth drafnidiaeth y gellir ei chyflawni sydd o fudd i gymunedau lleol.
Porth y Gorllewin yw'r bartneriaeth drawsranbarthol sy'n ymestyn o Abertawe i Swindon ac mae'n cynnwys poblogaeth o 4.4 miliwn o bobl.. Mae'r bartneriaeth yn dwyn ynghyd â busnesau, y byd academaidd a llywodraethau o ddwy ochr Afon Hafren i gydweithio mewn partneriaeth i greu cyfleoedd newydd a chyrraedd sero net.
Dan arweiniad Partneriaeth Porth y Gorllewin ac ARUP, mewn partneriaeth â Thrafnidiaeth Cymru a Chorff Trafnidiaeth Is-genedlaethol Porth y Gorllewin, bu'r tîm yn gweithio gyda sefydliadau'r sector cyhoeddus a phreifat o bob rhan o Dde Cymru a Gorllewin Lloegr. Mae'r weledigaeth newydd yn dangos sut y gallai'r ardal bron haneru amseroedd teithio cyfredol rhwng dinasoedd yr ardal a gwella teithiau i Lundain a mannau eraill yn y DU yn sylweddol.
Dywed Ian Edwards, Cadeirydd Pwyllgor Llywio Porth y Gorllewin ar Reilffyrdd Strategol a Phrif Swyddog Gweithredol y Cysylltiad Celtaidd ac ICC Cymru: "Mae'r wobr hon yn dyst i ymroddiad a gweledigaeth ein partneriaid a'n rhanddeiliaid ar y cyd. Mae Gweledigaeth Rheilffyrdd Porth y Gorllewin yn cynnig uchelgais mawr ei angen ar gyfer system reilffordd well sy'n diwallu anghenion yr ardal. Mae teithio effeithlon ar y rheilffyrdd yn hanfodol er mwyn cyflawni ein cyfrifoldeb sero net ar y cyd ond mae hefyd yn allweddol i’n galluogi i fynd i'r lleoedd hardd a'r cyfleoedd sy'n bodoli ar draws ein hardal.
"Bydd y Weledigaeth Rheilffyrdd hon yn drawsnewidiol i gymunedau sydd mewn perygl o gael eu gadael ar ôl ac rwy'n falch iawn o weld bod y rhaglen waith gydweithredol hon yn cael ei chydnabod gan y CIHT.
"Wrth i Borth y Gorllewin barhau â'i daith tuag at wella cysylltedd a datgloi cyfleoedd newydd i gymunedau, mae'r wobr hon yn ein hatgoffa o'r rôl hanfodol y mae cydweithredu yn ei chwarae wrth gyflawni canlyniadau trawsnewidiol."
Gellir gweld Gweledigaeth Rheilffyrdd lawn Porth y Gorllewin yma.